ذكريات مراهقتي في المتوسط

[كيووت بس موب مر]

ذكريات من مراهقة المتوسطة

أدري بتقولون وش قصة أمها ذي أول مرة لها في المنتدى وتعطينا ذكرياتها والله من الميانة الزايدة
بس معليش تحملوا البثارة قصدي البراءة يزيد معدلها في الإجازة خصوصاً بعد الإمتحانات اللطيفة اللي مرت علينا
**أقول خلينا نرجع للموضوع الأساسي أصرف المهم السالفة اللي صارت إهي :
(لما كنت في 2/م طحت في شلة معروفة في المدرسة بأنواع الدجة ولا ومن الفلاحة أكبر مني بس ولأني بكل فخر إنسانة إجتماعية من الدرجة الأولى قلت لازم أذب وجهي عليهم شوي ولما صرت معهم أحلى من السمن على العسل وصرت من الأعضاء المميزين في الشلة
وعدوني بمغامرة خطيررررررة على قولتهم وماراح تنسي طول العمر لكنهم ما علموني عن تكتيكهم ولا عن الخطة المحترمة اللي بتتنفذ في آخر يوم من الإمتحانات النهائية ومحدثتكم المسكينة ضعيفة الله تمشي وراهم كنها دجاجة صقعاء الشي الوحيد اللي عرفته أني لازم ألاقيهم عند البوابة الرئيسية بعد إنتهاء الفترة الأولى لأنه ما عندنا فترة ثانية ولما إجتمعت العصابة طلبت البندري "الزعيم " منا أننا نلبس عباياتنا ونروح وراها بس بتقولون وين المناوبات عنكم بس لا تخافون ما فات هالموضوع على الزعيم بتاع العصابة الي قالت للمناوبة أننا في باص خاص مع بعض وطبعا كانت مناوبتنا على نياتها ومشى الموضوع عليها وأنا للآن ما أدري وين الله حاطني فيه اللي فلحت فيه أني أمشي وراهم وبس ولما طلعنا لقينا سيارة البندري الكامري وفيها سواقهم الهندي عند الباب" طبعا ً أنا حسيت أن الموضوع فيه إنّ فقررت أرجع فقالوا لي أني لو رجعت بتنكشف كذبتنا وبنتوهق ونروح في خرايطها وطمنوني أن الموضوع كله روحه للسوبر ماركت وبس وأنهم بيحافظون علي مثل أختهم" وكنا 7 بنات فتراصينا وصار نصيب السمينات الكراسي والعصلان زيي غاصوا في حجر اللي عالكراسي المهم رحنا لسوبر ماركت وشرينا حلويات " يقلع أم البرائة اللي نعرفها " قررنا نرجع للمدرسة بعد ما تأخرنا حول النصف ساعة ولما رجعنا شكت فينا المناوبه "بسم الله عليها تو الناس " فسألتنا ليه رجعنا عاد كلنا إنطرمنا ولا عرفنا وش نقول فتكلمت الزعيمة وقالت أن الباص بنشر كفره فقرر السواق يرجعنا إلين يدبر سيارة ثانية "يعنبوأبو الفقش"
طبعا ماخش الموضوع مزاجها فتحولنا للإدارة اللي بعد مناقشات دروا أن السالفة نصب في نصب فكتبونا تعهد مع إستدعاء أولياء الأمور لأن الموضوع كبير دام فيه هروب من المدرسة
عاد الحين الكل يقول نفسي نفسي فقلت أنهم خذوني غصب عني "حشى إختطاف " فقلبت الشلة كلللللها علي وطلعوا حرتهم فيني فقالوا أني صاحبة الفكرة وأنهم كانوا رافضين في البداية نظراً لأخلاقهم الرفيعة فأصريت عليهم وأقنعتهم
عاد طارت عيون المديرة فيني وصرخة بكل ما أوتيت من قوة وقالت : هذي إستدعوا ولية أمرها عشان عشان تظفها وتظف ملفها معها ..The End
**شفتوا هذي آخرة ذبات الوجيه والتلزق في الداجين **
عاد هذا أول موضوع لي عندكم فالله الله بالردود وعساكم عالقوة